Retos lectores verán 2019
05/07 - 31/08
Biblioteca Pública de Vigo Juan Compañel

Lembrades os retos lectores do verán 2018?  Pois xa estamos noutro verán e queremos volver a desafiarvos. Esta vez facémosvos partícipes da concienciación das bibliotecas en relación con retos da nosa vida cotiá: igualdade, medio ambiente e alfabetización dixital.

Entre xullo e agosto hai case 9 semanas, imos propoñervos un reto lector cada tres semanas.

Animádesvos a participar?

Para que entendades  a que nos referimos cando falamos de concienciación das bibliotecas en relación con retos da nosa vida cotiá, trátase dos 17 obxectivos para transformar o noso mundo que a IFLA (International Federation of Library Associations) propón cumpir ás bibliotecas para seguir a Axenda 2030 da ONU:

  1. Poñer fin á pobreza en tódalas súas formas.
  2. Poñer fin á fame, lograr seguridade alimentaria e a mellora da nutrición e promover a agricultura sostible. 
  3. Garantir unha vida sana e promover o benestar para todos en tódalas idades.
  4. Garantir unha educación inclusiva, equitativa e de calidade e promover oportunidades de aprendizaxe durante toda a vida.
  5. Lograr a igualdade entre xéneros e apoderar a tódalas mulleres e nenas.
  6. Garantir dispoñibilidade de auga e a súa xestión sostible.
  7. Garantir o acceso a unha enerxía asumible, segura, sostible e moderna.
  8. Promover o crecemento económico sostido, inclusivo e sostible, o pleno emprego e o traballo decente.
  9. Construír infraestruturas duradeiras, promover a industrialización inclusiva e sostible e promover a innovación.
  10. Reducir a desigualdade entre os países.
  11. Lograr que as cidades e os asentamentos humanos sexan inclusivos, seguros, resistentes e sostibles.
  12. Garantir modalidades de consumo e produción sostibles.
  13. Adoptar medidas urxentes para combater o cambio climático e os seus efectos.
  14. Conservar e utilizar de forma sostible os océanos, os mares e recursos mariños para o desenvolvemento sostible.
  15. Protexer, restablecer e promover o uso sostible dos ecosistemas terrestres.
  16. Promover sociedades pacíficas e inclusivas para o desenvolvemento sostible, facilitar o acceso á xustiza para todos e crear institucións eficaces, responsables e inclusivas.
  17. Fortalecer os medios de execución e revitalizar a alianza mundial para o desenvolvemento sostible.



Os retos lectores que vos propoñemos están vinculados dalgún xeito a un ou varios obxectivos mencionados arriba:

1. LER UN LIBRO ESCRITO POR UNHA MULLER: OBXECTIVOS 4, 5,  10, 16.

2. LER UN LIBRO SOBRE MEDIO AMBIENTE:  OBXECTIVOS 6, 7, 11, 12, 13, 14, 15.

3. LER UN LIBRO ELECTRÓNICO: OBXECTIVOS 4, 8, 9, 10.