1. A biblioteca valorará os materiais que se pretende doar e decidirá se está interesada en recibir todos ou parte deles. Unha vez feita a valoración, porase en contacto coa persoa interesada para comunicarlle se acepta os materiais (todos ou parte deles) ou non.
A título orientativo, poderían ser de interese para a biblioteca os seguintes tipos de materiais:
- Libros, DVDs, CDs, folletos, fotografías, carteis, postais e calquera outro documento de autor galego ou referido a Galicia e moi especialmente os que fan referencia á localidade da biblioteca ou a súa bisbarra.
- Obras raras ou de especial valor bibliográfico, principalmente as anteriores a 1958.
- Libros e outros documentos de actualidade, ben encadernados e que se atopen en bo estado de conservación.
- Películas (en DVD ou Bluray), música (en CD ou vinilo), partituras, xogos de ordenador (en CD-ROM) ou videoxogos para consolas en bo estado.
Pola contra, con carácter xeral a biblioteca non aceptará:
- materiais en mal estado de conservación: rotos, sucios, danados, con humidade, etc.
- libros de texto.
- lexislación derrogada.
- temarios de oposicións atrasados.
- actas de congresos, xornadas.
- informes, memorias de institucións, anuarios, estatísticas, directorios.
- libros de informática desactualizados.
- guías de viaxes obsoletas (cunha antigüidade superior aos 2 ou 3 anos).
- dicionarios, enciclopedias, atlas.
- formatos desfasados como VHS, casetes, disquetes... agás que polo seu contido, temática local ou carácter singular poidan resultar de interese.
- coleccións de xornais ou revistas que non sexan de temática local, ou números soltos agás que completen a colección que xa conserva a Biblioteca.
Non se aceptarán copias de materiais que non respecten a Lei de Propiedade Intelectual.
2. Á vista da valoración que faga a biblioteca, a persoa interesada poderá deixar sen efecto o seu ofrecemento.
3. Se se acepta o ofrecemento, as condicións do traslado e recepción dos fondos fixaranse de común acordo coa biblioteca.
4. A entrega efectiva dos fondos que sexan aceptados pola biblioteca formalizarase cunha acta de recepción.
5. Unha vez entregados os materiais, a biblioteca adquirirá a súa plena propiedade e quedarán sometidos ao mesmo réxime xurídico e de protección que o resto dos seus fondos documentais.
6. A biblioteca xestionará os fondos adquiridos segundo o seu criterio. Neste sentido, disporá deles para a súa custodia, conservación, consulta, estudo, exhibición e difusión, catalogación e dixitalización, cando proceda, de acordo coa normativa aplicable. Poderá manter o conxunto dos materiais doados identificado como un fondo especial, ou ben separar os elementos que o compoñen, asignándolle a cada un deles o uso e tratamento máis adecuado. Así mesmo, poderá ceder ou trasladar estes materiais a outra biblioteca pública xestionada pola Consellería de Cultura, Lingua e Xuventude cando se considere máis adecuado en función da súa natureza e das condicións dos centros para a súa preservación, custodia e difusión. Finalmente, a biblioteca poderá someter os materiais recibidos a procesos de expurgo cando criterios técnicos así o aconsellen.
