Mañás poéticas

Nova sesión das Mañás poéticas da man de Carlos Arias, unha lectura aberta e libre de textos de diferentes autoras e autores, que no mes de outubro dedicamos ao poeta Fernando Pessoa, un dos máis brillantes e importantes da literatura mundial e, en particular, da lingua portuguesa.

Malia que a súa vida e a súa obra están intimamente ligadas á cidade de Lisboa, viviu parte da súa mocidade en Sudáfrica, onde recibiu unha educación británica que lle permitiu gañar a vida como tradutor. Pola noite, unha vez abandonada a oficina comercial na que transcorrían os seus días, escribía poesía encarnando diversos autores ficticios, heterónimos con diferentes estilos, modos e voces, un desdobramento literario da súa personalidade que converteu a Pessoa nun autor enigmático. A diferenza dos pseudónimos, os seus heterónimos son personalidades poéticas completas: identidades falsas que dalgún modo vólvense verdadeiras a través dunha manifestación artística propia e diversa do autor orixinal. Entre eles destacan Alberto Caeiro, Álvaro de Campos e Ricardo Reis. Con algún destes nomes chegaba mesmo a escribir e publicar críticas de obras que escribira baixo outros nomes. Un cuarto heterónimo de grande importancia na obra de Pessoa é Bernardo Soares, autor do Libro do desasosego, a súa principal contribución en prosa á literatura universal.

Pessoa morreu por problemas hepáticos aos 47 anos, na mesma cidade na que nacera. Deixou unha descomunal obra inédita, que aínda suscita análise e controversias.

Na sala de traballo A do terceiro andar. A entrada é libre ata un máximo de 15